That's Me

Не спаткаўшы ў свеце згоды...

Сярэдняя: 5 (1 голас)
5529792_4b159d83.jpg

Не спаткаўшы ў свеце згоды,
Сцішце хцівасці свае:
Не шукайце і свабоды –
Бо яе не існуе!

Мы – удзельнікі падзення
Духа ў плоць, нябыта ў быт –
Вязні месца нараджэння,
Веку пэўнага рабы,

Служкі вечнага прыгону:
Часу, грошай і сям’і,
Кватаранты абалонак
І заложнікі любві.

Вучні ўласнага грамадства
І ахвяры ўсіх навук,
І прадукцыя мастацтва,
І падзёншчыкі прынук.

Лёс, як хоча, круціць намі,
Душам волі не дае:
Душыць петлямі абставін,
Вяжа повязі свае,

Шлях каменнямі ўсцілае
І збівае ногі ў кроў,
А ўпадзеш – дык вымушае
Падымацца й крочыць зноў.

Паасобку і супольна
Ўсе залежым – хоць крычы!
Ой, няма між намі вольных –
Анідзе і ані ў чым!

18.08.2011