That's Me

Жыццё... Знявага альбо чэсць?

Сярэдняя: 4.8 (4 галасоў)

Жыццё… Знявага альбо чэсць?
Мы ўладары ці інтэрвенты?
Ці свет – палата нумар шэсць,
А мы ў ёй – толькі пацыенты?

Караюць нас лязом пакут
Ці лечаць сродкамі зямнымі?
О, людзі! Што мы робім тут
Рукамі й сэрцамі сваімі?

Сціскаюць душы ланцугі
Пытанняў, пошукаў, сумненняў.
Мы прагнем лекаў ад тугі –
Ды б’емся ў шкло неразумення.

Няўжо да праўды не дайшлі
Сярод разгубленасці, стомы:
Што ўсе мы – госці на зямлі,
Хоць і трымаемся, як дома?

2.01.2011